ယနေ့သည် ၁၃၇၀ ပြည့်နှစ် တပေါင်းလပြည့်နေ့ အခါသမဖြစ်သည်။မြတ်ဗုဒ္ဓသည် ကာဋ္ဌုဒါယီမထေရ်၏ လျှောက်ထားချက်အရ ရဟန္တာအရှင်သူမြတ်နှစ်သောင်းခြံရံလျှက် မဟာသက္ကရာဇ် ၁၀၃ ခု တပေါင်းလပြည့်ကျော် ၁ရက်တွင် ရာဇဂြိုဟ်မှ ယူဇနာ ၆၀ ကွာဝေးသော ဖွားရာဇာတိ ကပိလ၀တ်နေပြည်တော်သို့ တစ်နေ့လျှင် တစ်ယူဇနာခရီးဖြင့် ရက်ပေါင်း ၆၀ တိုင်တိုင် နှစ်လကြာမျှ ဒေသစာရီ ကြွချီတော်မူခဲ့ရာ လမြတ်တပေါင်းလကို ဗုဒ္ဓဘာသာဝင်အပေါင်းက "ဤတပေါင်းလပြည့် မြတ်ဗုဒ္ဓပြည်တော်ဝင် အခါတော်နေ့ " နှစ်စဉ် ကျင်းပကြသည်။
တပေါင်းလအခါသမယတွင် ရာသီပွဲတော်ဖြစ်သည့် သဲပုံစေတီပွဲတော်ကိုလည်း ကျင်းပကြသည်။ ယနေ့တွင် ဗုဒ္ဓဘာသာဝင်များသည် နေပြည်တော်နှင့် ရန်ကုန်မြို့တို့အပါအ၀င်ဒေသအသီးသီးရှိ ဘုရား၊ ပုထိုး၊စေတီများ၌ ပုညဘိသခါင်္ရတည်းဟူသော ကုသိုလ်ပုညပြုကြသူများ၊သမထနှင့် ၀ိပဿနာဘာဝနာပွားများကြသူများဖြင့် အထူးစည်ကားများပြားလျက်ရှိသည်။
တပေါင်းလပြည့် အခါသမယတွင် နေပြည်တော်ရှိ ဥပ္ပါတသန္တိစေတီတော်မြတ်ကြီး၌ ဘုရားဖူးလာရောက်ကြသူများ၊ကုသိုလ်ကောင်းမှု ပြုကြသူများဖြင့် အထူးစည်ကားသည်ကို တွေ့ရသည်။
အလားတူ နေပြည်တော် ဘောဂသိန္တိရပ်ကွက်၌ တည်ထားသည့် ဓာတုစယဓာတ်ပေါင်းစုစေတီတော်၌လည်း ကုသိုလ်ကောင်းမှု ပြုကြသူများဖြင့် အထူးစည်ကားလျက်ရှိသည်။
ထို့အတူ နေပြည်တော်ပျဉ်းမနားရှိ သမိုင်းဝင် ဘုရားကိုးဆူစေတီတော်၊ လောကမာရဇိန်ဘုရား၊ ကိုးခမ်းကြီးဘုရား၊ လောကရန်နှိမ်ဘုရားစသည့်ဘုရားစေတီပုထိုးများ၌ ကုသိုလ်ကောင်းမှု ပြုကြသူများဖြင့် စည်ကားလှသည်။
ရွှေတိဂုံစေတီတော် ဂေါပကအဖွဲ့က ကြီးမှူး၍ နံနက်ပိုင်းတွင် စေတီတော်ရင်ပြင် ရာဟုထောင့်အောင်မြေ၌ ဘာသာရေး အသင်းအဖွဲ့များ ၊ ၀န်ထမ်းများနှင့် ဘုရားဖူးပြည်သူများက စေတီတော်မြတ်ကြီးအား ဆွမ်းတော်ကြီး ကပ်လှူကြသည်။
ထို့နောက် နံနက် ၉ နာရီခွဲတွင် ၂၅၉၇ နှစ်မြောက် ဗုဒ္ဓပူဇနိယ တပေါင်းပွဲတော် ရေစက်ချအနုမောဒနာ အခမ်းအနားကို ချမ်းသာကြီးတန်ဆောင်း၌ကျင်းပရာ ရွှေတိဂုံစေတီတော် ဂေါပကအဖွဲ့ သြ၀ါဒါစရိယဆရာတော်ထံမှ ဂေါပကအဖွဲ့ဝင်များ၊ ဘာသာရေးအသင်းအဖွဲ့ဝင်များနှင့် ဘုရားဖူးပြည်သူများက တရားနာယူကြသည်။
ထို့အတူ ဆူးလေစေတီတော်၊ ဗိုလ်တထောင်ကျိုက်ဒေးအပ်ဆံတော်ဦးစေတီတော်၊ စွယ်တော်မြတ်စေတီတော်၊ သမိုင်းဝင် အပရာဇိတဆံတော်ရှင် ကျိုက်ဝိုင်းစေတီတော်တို့၌လည်း ဘုရားဖူးပြည်သူများ၊ ဥပုသ်သီတင်း ဆောက်တည်ကြသူများဖြင့် စည်ကားလျက်ရှိသည်။
အလားတူ ကမ္ဘာအေးစေတီ၊ မဟာဝိဇယ၊ ကိုးထပ်ကြီး၊ ခြောက်ထပ်ကြီး၊ ငါးထပ်ကြီး၊ ရွှေဘုန်းပွင့်စေတီတော်၊ ကျိုက္ကစံစေတီတော်၊ လောကချမ်းသာ အဘယလာဘမုနိ ဗုဒ္ဓရုပ်ပွားတော်မြတ်ကြီး၊ တောင်ဥက္ကလာပစေတီ၊ မယ်လမုဘုရား၊ ကျိုက္ကလို့၊ ကျိုက္ကလဲ့၊ ကျိုက်မှော်ဝန်းရေလယ်ဘုရား၊ ကျိုက်ခေါက်စေတီတော်၊ ပါဒကြီးဘုရား၊ ခရမ်းမြို့ သွန်းဘုရားကြီးအပါအ၀င် ရန်ကုန်မြို့ရှိဘုရား၊ စေတီပုထိုးများ၌ ကုသိုလ်ပုညပြုကြသူများ၊ ဒါန၊ သီလ၊ ဘာဝနာပြုကြသူများဖြင့် အထူးစည်ကားလျက်ရှိသည်။